డాక్టర్ భీంపల్లి శ్రీకాంత్

రుబాయిలు

వార్త దినపత్రిక 23 ఏప్రిల్ 2018 సోమవారం 

కన్నీళ్ళను దాటుకుంటూ సంసారాన్ని మోస్తాను

కడలి కెరటాకోసం ఆదర్శంగా తీసుకుంటాను

కన్నీరే జీవితాన్ని స్వాంతనపరిచేది ఎప్పుడూ

బాధల బరువులతోనే బతుకును సాగిస్తాను

కష్టసుఖాలుంటేనే జీవితాన బతుకంటే

అలజడులుంటేనే ఆటుపోట్ల కడలంటే

చీకటివెలుతురులే జీవితంలో ఎప్పుడూ

కలిమిలేములుంటేనే బతుకు సాగడమంటే

జాబిల్లిన్నడుగుతాను చలువపందిరేయమని

సూర్యుడిన్నడుగుతాను వెచ్చనికౌగిలీయమని

రాత్రిపగలు జోడుగుర్రాలే కాలానికి ఎప్పుడూ

సాగరాన్నడుగుతాను తీరానికి చేర్చమని

ఎన్నెన్నో ముసుగులు కనపడని మనిషిలో

ఎన్నెన్నో ముసురులు అలుముకున్న చీకటిలో

కుట్రలుకుతంత్రాలే బతుకుదారిలో ఎప్పుడూ

ఎన్నెన్నో మాయలు కనిపించని గమనంలో

కనిపించని మానవతను కాగడాతో వెతుకుతాను

అగుపించని సమానతను దివిటితో పహారాకాస్తాను

సమతమమతలే మానవాళికి ఆదర్శం ఎప్పుడూ

అడుగడుగున దానవతను కలంతో తరుముతాను

✍✍ డాక్టర్ భీంపల్లి శ్రీకాంత్