డాక్టర్ భీంపల్లి శ్రీకాంత్

*మొగ్గలు*

గణేష్ దినపత్రి 01-02-2018

అతడు దివ్యాంగుడు అయితేనేం

అవనిలో ఏలే రాజవుతున్నాడు

ఆత్మవిశ్వాసం అతని వజ్రాయుధం

అతడు అసమానతల సమాజంలో

సమానతకై పోరు సలుపుతున్నాడు 

సమానత్వం అతని ఆశయకిరణం

అతడు అంధత్వంలో కొట్టుమిట్టాడుతూనే

అవిటివాడై ఒంటరిగా జీవిస్తున్నాడు

హరివిల్లు అతని తీరని కోరిక

అతడు వెలుగుకై పరితపిస్తూనే

బతుకు చీకటితో యుద్ధం చేస్తున్నాడు

గుండెధైర్యం అతని సంకల్పబలం

అతడు విత్తనమై మొలకెత్తుతూనే

ఎదిగే వృక్షమై నీడను కంటున్నాడు

అచంచలం అతని ఆత్మవిశ్వాసం

అతడు చీకటిజగతిలో పయనిస్తూనే

వెలుగురేఖయై ప్రసరించాలనుకుంటున్నాడు

దినదినగండం అతని మూడవనేత్రం

అతడు ఉషోదయంకై వేచిచూస్తూనే

జీవిత ప్రయాణాన్ని సాగిస్తున్నాడు

వెలుగు కోసం అతని ఆరాటం

అతడు వెక్కిరింతలను భరిస్తూనే

నూతన సమాజాన్ని స్వప్నిస్తున్నాడు

జ్ఞాననేత్రం అతని అస్తిత్వకేతనం

అతడు సజీవనదియై ప్రవహిస్తూనే

కొత్త దారులను వెతుక్కుంటున్నాడు

నవలోకసృష్టి అతని ప్రాణవాయువు

అతడు జ్ఞానజ్యోతియై ప్రకాశిస్తూనే

జగతికి విజ్ఞానాన్ని పంచుతున్నాడు

ప్రతిభ అతని ఆరోప్రాణం          

✍ *భీంపల్లి శ్రీకాంత్*

01-02-2018