డాక్టర్ భీంపల్లి శ్రీకాంత్

 * మొగ్గలు *

''స్వర్ణపుష్పం'' మాసపత్రిక ఫిబ్రవరి 2018

రివ్వున ఎగిరిపోయే పక్షులకు తెలుసు

దారిలేని గమనానికి పయనం ఎంతో

విహంగం ఒక స్వేచ్ఛా వాయులీనం

నిత్యం అడుగులేసే పాదాలకు తెలుసు

గమ్యాన్ని చేర్చే ఆగమనం ఇంకెంతో

చివరి మజిలీ ఒక అంతిమవిజయం

సాగరాన పడిలేచే కెరటాలకు తెలుసు

ఆటుపోట్ల అలజడుల అలసట ఎంతో

కెరటం అనంతకల్లోల దుఃఖసముద్రం

చెక్కిలిపై జారిపడే కన్నీటికి తెలుసు

గాయపడిన గుండెల్లోని బాధల బరువెంతో

జీవితం దుఃఖాన్ని ఒంపుకునే కన్నీటిజలపాతం

కవితాలతలు అల్లే అక్షరపూలకు తెలుసు

పరిమళించే సాహిత్యం సమాజానికెంతో

కవిత్వం సమాజాన ప్రకాశించే మణిరత్నం

 ✍ *భీంపల్లి శ్రీకాంత్*