డాక్టర్ భీంపల్లి శ్రీకాంత్

🌷 ఆసుపత్రి గీతం 🌷

గణేష్ దినపత్రిక 09-05-2018

వైద్యుడు నారాయణుడే

రోగుల ప్రాణాలను కాపాడే దేవుడే

కొనఊపిరితో కొట్టుమిట్టాడుతున్న

రోగులకు ప్రాణభిక్షపెట్టే అపరధన్వంతరి

సత్తువ కోల్పోతున్న శిథిల దేహాలకు

లేపనం పూసే అపరసంజీవని

బాధల బరువుతో భారంగా అడుగులు వేస్తామా

ఆసుపత్రి ఆపన్నహస్తమై స్నేహహస్తమందిస్తుంది

అనుమానాల మెట్లతో ఆసుపత్రిని పలుకరిస్తామా

దిగులు చీకటికి వెలుగురేఖయై ప్రసరిస్తుంది

గుండెలో తొలుస్తున్న అనుమానాలకు

వైద్యుడి పలకరింత ఒకింత ఉపశమనం

వట్టిపోయిన మనిషి గాయాలకు

వైద్యుడి చికిత్స వేకువ రవికిరణం

అక్కడ బతుకు ఒక నిత్యపోరాటం

జీవించాలన్న తపనకు మూలసూత్రం

దినదినగండంగా బతకడమే

ఆసుపత్రి నేర్పిన జీవనసూత్రం

వైద్యపరీక్షల ఫలితాలు తేలనిదే

రోగులకు బతుకు తెల్లారదు

పరీక్షల మీద పరీక్షలు చేపట్టనిదే

వైద్యుల నాడీ అంతుపట్టదు

ఎన్ని రోజులు పడుతుందో 

రోగి జబ్బు నయం కావడానికి

ఎన్ని రాత్రులు తెల్లవారాల్లో

రోగం ప్రపంచాన్ని పలకరించడానికి

వైద్యసేవలు అనునిత్యం అందిస్తున్నా

రోగం నవ్వుతూ రోగిని వెక్కిరిస్తుంటుంది

గంటలు యుగాల్లా గడిచిపోతున్నా

వైద్యం మౌనరాగాలను ఆలపిస్తుంటుంది

ఆసుపత్రిలో అడుగు పెట్టినామంటే

బతుకుపై ఆశలు ఆవిరవుతుంటాయి

వైద్యుల ప్రశ్నలకు ఉక్కిరిబిక్కిరవుతున్నామంటే

బతుకుపై ఆశలు సన్నగిల్లుతుంటాయి

సూర్యుడు ఉదయిస్తున్నాడంటే 

అస్తమయానికి దగ్గర అవుతున్నట్టే

వెలుగు కాంతికిరణమై ప్రసరిస్తుందంటే

చీకటిగాయాల తోకలు ముడిచినట్టే

అవును...

వైద్యుడు నారాయణుడు

వైద్యో నారాయణో హరి !

✍✍⚘ డాక్టర్ భీంపల్లి శ్రీకాంత్ ⚘🌷