🎼🎷నవ్య మీడియా 🎶🎶 13-05-2018🎷🎼 |
అపుడపుడు ఆసుపత్రికి వెళ్లి
అభాగ్యులను పలకరించి వద్దాం
గోడలపై నిత్యం ప్రతిధ్వనించే
రోగుల ఆర్తనాదాలను విని వద్దాం
ఎంతమంది రోగపీడితులు అక్కడ
బతుకుపై భరోసాతో జీవిస్తారు
ఎంతమంది బంధువులు అక్కడ
రోగులను కంటికి రెప్పలా చూసుకుంటారు
ఆసుపత్రి నిరంతరం మౌనగీతాన్ని వినిపిస్తూనే
అభాగ్యుల సేవలో ఆపద్భాంధవుడిలా తరిస్తుంటుంది
అనేక మూగరోదనలను మనసులో దాచుకుంటూనే
నిండుధైర్యంతో ఆపన్నహస్తమై ఆదుకుంటుంది
గంపెడంతా ఆందోళనతో ఇంటికి దూరమవుతాడా
సజలనేత్రాలతో ఇల్లు వీడ్కోలు పలుకుతుంది
బరువెక్కిన గుండెతో భారంగా అడుగులు వేస్తాడా
ఆసుపత్రి ఆత్మీయనేస్తమై పలకరిస్తుంది
రోగి బాధలను తన బాధగా చేసుకుని
ఆవేదనభారాన్ని దించే లేపనమవుతుంది
రోగులకు స్నేహహస్తాన్ని అందిస్తూనే
గుండెభారాన్ని దించే నేస్తమవుతుంది
రోగుల హాహాకారాలను విన్నప్పుడల్లా
బంధువులు అచేతనశిల్పాలవుతుంటారు
బతుకుపై ఆశతో జీవిస్తున్నప్పుడల్లా
నిశ్చేష్టులై ఒంటరిబతుకు గడుపుతుంటారు
అపరసంజీవనేదో వారికి ఆసరా అవుతుందని
వేయికళ్ళతో నిత్యం ఎదురుచూస్తుంటారు
వైద్యుల చికిత్సతో నయం అవుతుందని
ఆశాజీవులై పడిగాపులు గాస్తుంటారు
అపుడపుడు ఆసుపత్రిని పలకరించి వద్దాం
గుండెగొంతుకలో తండ్లాడే బాధను విందాం
బాధాసర్పదష్టుల బాగోగులను చూద్దాం
కాసింత ఉపశమనమై ఊపిరి పోద్దాం
✍⚘ డాక్టర్ భీంపల్లి శ్రీకాంత్ ⚘🌷
కామెంట్లు లేవు:
కామెంట్ను పోస్ట్ చేయండి