డాక్టర్ భీంపల్లి శ్రీకాంత్

* 🌷రైలు మొగ్గలు🌷*

గణేష్ దినపత్రిక 03-03-2018

ప్రకృతిని నిత్యం తనలోకి ఒంపుకుంటూనే

పిల్లతెమ్మెర గాలులతో చెలిమి చేస్తుంది

రైలు ప్రయాణీకులను సాంత్వనపరిచే నేస్తం

ప్రపంచాన్ని సరికొత్తగా పరిచయం చేస్తూనే

అపరిచితులతో ఆలింగనం చేయిస్తుంది

రైలు అనుబంధాలను సృజించే వాహిక

రాత్రీ పగలు అంటూ తేడా లేకుండానే

నిరంతరం ప్రయాణికుల గమ్యాన్ని చేరుస్తుంది

రైలు దూరతీరాలను కలిపే వంతెన

ఒంటరి పక్షులకు ఆసరా అవుతూనే

అనాధలకు ఆశ్రమంలా ఆశ్రయాన్నిస్తుంది

రైలు అభాగ్యులకు నిత్య కల్పతరువు

కొండకోనల్లో వయ్యారంగా పరుగిడుతూనే

పక్షుల కిలకిలరావాలను కమ్మగా పాడుతుంది

రైలు సంగీతాన్ని వినిపించే రాగాలపల్లకి

విభిన్న మనుషులతో చెలిమి చేయిస్తూనే

కొత్త అనుబంధాలకు శ్రీకారం చుడుతుంది

రైలు సరికొత్త బంధాలను కలిపే వారధి

గమ్యాన్ని చేరాలని ఉబలాటపడుతుంటే

సిగ్నల్ అడ్డంకులు తగులుతూనే ఉంటాయి 

రైలు ప్రయాణమంటే జీవితకాలం లేటు

మనిషికి జీవితపాఠాలను నేర్పుతూనే

సప్తవర్ణాల ఇంద్రధనుస్సు అవుతుంది

రైలు రంగురంగుల ప్రపంచపు నవలోకం

కళాకారుల పాటలను అందంగా వినిపిస్తూనే

హృదయాలను ఆనందపరవశుల్ని చేస్తుంది

రైలు సకల కళాకారులకు సౌభాగ్యనిలయం

విభిన్నమైన ప్రపంచాన్ని తనతో తీసుకెళ్తూనే

సరికొత్త రంగస్థల జీవితాన్ని ప్రదర్శింపజేస్తుంది

రైలు నవరసాల నాటక సమ్మేళనం

✍✍🌷⚘డాక్టర్ భీంపల్లి శ్రీకాంత్ ⚘🌷