 |
 🌷 నవ్య మీడియా : మర్చి : 07, 2018 |
రాయడానికేముంది
వస్తువులు అన్నీ అయిపోయినంక
అనుకుంటామా
ఇంకా ఏదో మిగిలే ఉంటుంది
కవిత్వీకరించడానికేముంది
కవులంతా వస్తువులను మింగేసినంక
అనుకుంటామా
ఇంకా ఏదో మిగిలే ఉంటుంది
సూర్యుడు రోజూ కిరణాలను ప్రసరిస్తున్నా
వెలుగును పంచే ఉదయాలు అవే
చంద్రుడు రోజూ వెన్నెలను వెదజల్లుతున్నా
చల్లదనం కురిపించే వసంతరాత్రులు అవే
నది నిరంతరం ప్రవహిస్తూనే ఉంటుందా
ఏదో కొత్త దారిని వెతుక్కుంటుంది
కాలువ పరవళ్లు తొక్కుతూనే ఉంటుందా
ఏదో సరికొత్త బాటను తొక్కుతుంది
మనం ఇంకా బతికున్నామంటే
ఏదో కొత్త చూపును చూస్తున్నట్టే
మనం ఇంకా తింటున్నామంటే
ఏదో కొత్త రుచిని ఆస్వాదిస్తున్నట్టే
అనంతాన్ని అక్షరాలలో బందిస్తూనే
రవిగాంచని చోట దార్శనికుడవుతాడు
ప్రకృతిని పదాలలో అభిషేకిస్తూనే
ప్రపంచాన్ని అద్దంలా పట్టిచూపుతాడు
ఎంతగా కవిత్వం రాసినా…
ఇంకా ఏదో మిగిలే ఉంటుంది
కవిగుండెల్లో ఏదో కెలుకుతూ ఉంటుంది
అవును…
ఇంకా కవిగుండె కొట్టుకుంటూనే ఉంటుంది
కవికలం కొత్త వస్తువు కోసం
నిత్యం ఎదురుచూస్తూనే ఉంటుంది
కామెంట్‌లు లేవు:
కామెంట్‌ను పోస్ట్ చేయండి