డాక్టర్ భీంపల్లి శ్రీకాంత్

🌷 మొగ్గలు 🌷

గణేష్ దినపత్రిక 18-03-2018

అసమానతల అడ్డుగోడలను కూలిస్తేనే కదా

సమసమాజం వెలుగుదివిటీలా ప్రకాశించేది

మానవత్వమే మనిషికి మమతలపూదోట

అంటరానితనాన్ని రూపుమాపితేనే కదా

సమాజంలో దురాచారం నిర్మూలించబడేది

అంటరానితనం అవనికే మాయనిమచ్చ

అహంకారాన్ని అందరూ వీడి సాగితేనే కదా

మమకారపు మల్లెతోటలా విరగబూసేది

అహంకారమే మనిషిని కాల్చే నిప్పులకొలిమి 

అసూయను దరికి చేరనివ్వకపోతేనే కదా

ప్రేమానురాగాలు నవపల్లవమై ఆలపించేది

అసూయ మనిషిని దహించివేసే అనుమానం

అజ్ఞానాంధకారాన్ని తొలగించి వేస్తేనే కదా

విజ్ఞానవెలుగులు అవనిలో విరజిమ్మేది

అజ్ఞానం మనిషిని వేధించే చీకటిరాజ్యం 

అన్యాయాన్ని ఆమడదూరం పెడితేనే కదా

న్యాయం చైతన్యకెరటమై ఎగిసిపడేది

అన్యాయం సమాజాన్ని పీడించే జలగ

అవినీతి దుర్గంధానికి దూరం ఉంటేనే కదా

నీతిసుగంధం స్వచ్ఛనదిలా ప్రవహించేది

అవినీతి మనిషిని కాటువేసే లంచావతారం

✍✍🌷 డాక్టర్ భీంపల్లి శ్రీకాంత్ ⚘🌷🌷