🌷 ప్రకృతి పరవశం 🌷
ఆంధ్రజ్యోతి మహబూబ్ నగర్ 15-మార్చి 2018 |
రాలిపోయిన ఆకులు మళ్ళీ చిగురిస్తేనే కదా
ప్రకృతి పరవశంతో ఆనందంగా నాట్యమాడేది
నవరస పరిమళాల షడ్రుచుల పండుగ ఉగాది
కాలం కొత్త చిగురులను తొడిగితేనే కదా
జీవితం వసంతమై నవోన్మేషంగా పల్లవించేది
సుఖసంతోషాల చెరకుతీపి పండుగ ఉగాది
మదిలో చేదుజ్ఞాపకాలను మరిచిపోతేనే కదా
ఆనందాల అనుభూతులను అనుభవించేది
చేదు జ్ఞాపకాల వేపపూత పండుగ ఉగాది
వసంతకోకిల కవితాగానం చేస్తేనే కదా
మామిడితోరణాలు స్వాగతగీతం పలికేది
వగరుపంచే మామిడికాయ పండుగ ఉగాది
కష్టసుఖాలు జీవితంలో భాగమైపోతేనే కదా
కడవరకు బతుకుబండిని నేర్పుగా నడిపేది
చింతపండు పులుపు పండుగ ఉగాది
షడ్రుచులను జీవితంలో రుచిచూస్తేనే కదా
మంచిచెడులను సమన్వయంతో స్వీకరించేది
సహనం నేర్పే మిరపకారం పండుగ ఉగాది
కొత్తవసంతం ఉల్లాసంగా అడుగిడితేనే కదా
ఉత్సాహంగా జీవితం నవరసభరితమయ్యేది
రుచికి సంకేతమైన ఉప్పు పండుగ ఉగాది
✍✍🌷డాక్టర్ భీంపల్లి శ్రీకాంత్ 🌷
కామెంట్లు లేవు:
కామెంట్ను పోస్ట్ చేయండి