ఆలోచనలు వెంటాడినప్పుడల్లా
అక్షరాలు మొలకెత్తుతూనే ఉంటాయ్
అక్షర సంగమం కవిత్వం
దూరాలు ఆహ్వానించినప్పుడల్లా
గమనాలు పరుగు పెడుతూనే ఉంటాయ్
గమ్యం చివరి మజిలీ
హృదయాలు ఆవిష్కరించినప్పుడల్లా
స్నేహపరిమళాలు వికసిస్తూనే ఉంటాయ్
స్నేహం అనురాగసంగమం
పువ్వులు విరబూసినప్పుడల్లా
సుగంధాలు ఆహ్లాదపరుస్తూనే ఉంటాయ్
పరిమళం అందరికీ మకరందం
జ్ఞాపకాలు గుర్తొచ్చినప్పుడల్లా
అనుభవాలు పలకరిస్తూనే ఉంటాయ్
గుండెతడి జ్ఞాపకాల మూట
ఉదయాలు ప్రభవించినప్పుడల్లా
కిరణాలు ప్రకాశిస్తూనే ఉంటాయ్
ఉషస్సు లోకానికి వెలుగు
ఆనందాలు అతిశయించినప్పడల్లా
సంతోషాలు చిగురిస్తూనే ఉంటాయ్
మనసు మమతల లోగిలి
నదులు ప్రవహించినప్పుడల్లా
సముద్రాలు ఆహ్వానిస్తూనే ఉంటాయ్
సాగరం అనంత తటాకం
పక్షులు ఎగిరినప్పుడల్లా
మలయమారుతాలు పరవశిస్తూనే ఉంటాయ్
సమీరం వసంతరాగం
శిల్పాలు తయారైనప్పుడల్లా
శిలలు ఆనందిస్తూనే ఉంటాయ్
శిల్పి జన్మ చరితార్థం
బతుకులు సాగిపోతున్నప్పడల్లా
కష్టాలు వెంటాడుతూనే ఉంటాయ్
జీవితం కష్టసుఖాల కలబోత
- డాక్టర్ భీంపల్లి శ్రీకాంత్
కామెంట్‌లు లేవు:
కామెంట్‌ను పోస్ట్ చేయండి